Lily Eberwein

Lily Eberwein Abdullah (11 Madas 1900 – 1980) nopo nga songulun nasionalis Sarawak om aktivis hak tondu. Aparagat isido id suang kopoindalanan anti-kapanahakan do Sarawak, ontok toun 1940 mooi do manganu kawagu kagabasan Sarawak mantad kopomorintaan do British.Ogumu o kouhupan guraan diti kumaa koimogoton politik momogun sandad om nakaanu pinopoingkawas sunduan patriotik id koposion mogigion id pogun Sarawak.

Biografi

Kopointutunan

Lily Eberwein Abdullah nopo nga kitinaru Eurasia om kibansa' Eropah om Melayu. Tapa dau i John Eberwein nopo nga kitinaru Belanda om Scotland mantad Kepulauan Cocos om kipionitan miampai do paganakan Clunies-Ross, momomorinta' pulau dii. Tapa di Lily koumbal suminiliu kapten kapal di Rajah Brooke montok Syarikat Straits Steamship. Tama dau i Maznah bt. Ali bin Alang nopo nga songulun tondu Melayu mantad Simanggang . Poingiyon yolo id Singapura om haro duo tanak diolo, i Lily om Edward. Maznah nopo nga songulun Muslim nga i Lily om Edward nopo nga kitoilaan do Kristian. Nakaanu i Lily do pondidikan pogulu id St. Mary's Mission School id Kuching, Sarawak gisom walu toun o umul dau om pinotilombus dau sinikulan disido id Raffles Girls' School id Singapura.

Pengislaman

Kalapas do kinapataion tapa dau, guminuli i Lily miampai tama dau id Kuching om pinotilombus dau o sinikulan dau gisom Darjah Koturu (miabal do Pangaan Kotolu, umul 15 toun) id St. Mary's Mission School. Kinapataion tapa dau nokoponimban do woyo' koposion paganakan dau. Nuru do minsingubas i Lily do pondidikan Malayu Muslim, miampai rinuhangan do Abdullah id ngaran dau. Id suang do iso ponorubungan, tanak tondu dau i Hafsah Harun pinopointalang do tituduk tama dau nopo nga misuai miampai do tanak tondu Malayu di suai. Sabab do noubas no yau do woyo' koposion Eropah id Singapura, kopuriman yau do natagak o kosinggawaan dau om kopuriman yau do apagon do mononsorundung om au milo sumoliwan mantad id walai. Noubas no yau tumboyoon do pelayan kusai maamaso id Singapura nga soira guminuli id Kuching minog do tumboyoon dau o mamai dau. Isido nopo nga koilo do misosondii tu nakaanu pondidikan Barat. Suminuang i Lily do Islam di toun 1913. Nosuaian o tongosombol disido do toilaan dau kokomoi ugama wagu dau, gisom do ogumu tulun id kampung dau papaatod tangaanak diolo hilo di Lily montok minsingilo do mambasa Al-Quran. Ahal diti popokito do otumbayaan om mamantang o tulun kampung kumaa dau tu tondu nopo id timpu dii amu ogumu i mongia' do ugama. Notorimo no isido om nointutunan no yau sabaagi tulun Malayu Muslim.

Pakalajaan pogulu

Id toun 1927, minomorekrut i Mr Tate, pengarah iso syarikat tolipaun di Lily Eberwein montok kumaraja' sabaagi operator tolipaun, poposiliu isido sabaagi tondu Malayu di kumoiso nogi poingkaraja' id jabatan porinta'. Alantas o boros Malayu om Inggeris dau om ahal diti popouhan do karaja' dau id syarikat tolipaun dii. Tambalut di Mr. Tate nogi o tapa dau.

Id toun 1929, minamalatak yau jawatan soira nalantik yau sabaagi Luguan Sikul id Sekolah Perempuan Melayu Permaisuri i noukab id Kuching ontok toun 1930. Tinahak nogi yau jawatan sabaagi setiausaha boogian Malayu, i Mary Ong, Barbara Bay om Mrs. Gopal nopo nga luguan montok boogian Cina, Iban om India. Ointutunan yau sabaagi Cikgu Lily sabab do kaampayatan dau id suang gana do pondidikan.

Pisasawaan

Alaid yau nakasawo om nakasawo nogi yau ontok toun 1938. Haro tolu tanak tondu dau, tanak koiso dau i Hafsah nopo nga nosusu ontok toun 1940. Sawo dau i Harun bin Haris nopo nga kiumul hopod toun omulok ko' mantad dau om poingkaraja' id Pasukan Konstabel Polis Sarawak. Monokodung tomod i Gundohing Harun do kaampayatan dau id suang gerakan antikapanahakan om gana pondidikan. Id timpu dii, manansawo id umul di lobi otuo' om kisawo di lobi omulok tantu no do kopoimbulai do kontroversi. Sundung do ingkaa, kakal do pantangon isido do tulun ginumuan Malayu tu otoboi yau do monuduk kosumandakan Malayu.